ஒரு சூழ்நிலையில் உங்களோடு வேலை செய்பவர்கள் உங்களைத் தவறாய் புரிந்துகொண்டு குற்றம் சாட்டுவதாக வைத்துக் கொள்ளுங்கள். நீங்கள் என்னதான் விளக்கம் கூறினாலும், அவைகளைக் கேட்பதற்கு அவர்கள் ஆர்வம் காட்ட மாட்டார்கள். இவ்வாறு நீங்கள் முற்றிலும் குற்றமற்ற சூழ்நிலையில் நீங்கள் செய்ய வேண்டியதென்ன? இந்த நிலைக்காக நீங்களே நொந்து மடிந்து கொள்வதா? தேவையேயில்லை! தேவனுக்கும் மனுஷருக்கும் முன்பாக உங்கள் மனசாட்சி தூய்மையாய் இருக்கிறதா என்பதை மாத்திரம் உறுதி செய்யுங்கள்.... பின்பு, இந்த விஷயத்தை உங்கள் தேவனிடமே விட்டுவிடுங்கள்! நீங்கள் செய்யக்கூடியதெல்லாம், இது ஒன்றுதான்!! இந்த வழிமுறையைத்தான் நான் பல ஆண்டுகளாய் பின்பற்றி வருகிறேன். அதினிமித்தம் நான் மெய்யாகவே ஆசீர்வதிக்கப்பட்டும் இருக்கின்றேன். ஆகவேதான், இதே வழிமுறையை நீங்களும் பின்பற்றும்படி உங்களுக்கும் ஆலோசனையாகக் கூறுகிறேன்.

கர்த்தருக்கு ஊழியத்திற்கு பயனுள்ளவர்களாய் இருக்கும் ஒவ்வொருவரும் சாத்தானின் தாக்குதலுக்கு ‘இலக்காக’ இருக்கிறார்கள். நாம் எந்த அளவிற்கு தேவனுக்குப் பயனுள்ளவர்களாய் இருக்கிறோமோ அந்த அளவுக்கு சத்துருவால் நாம் தாக்கப்படுவோம்! இத்தாக்குதலைத் தவிர்த்திட நம்மால் முடியாது. சாத்தான் நிச்சயமாய், அவதூறுகள்.... பொய்யான குற்றச்சாட்டுகள்.... திரித்துக் கூறப்பட்ட கதைகள்.... போன்றவைகள் மூலமாய் நம்மைத் தாக்கிடவே செய்வான்! அதுமாத்திரமல்ல, அவன் நம்முடைய மனைவியையும், பிள்ளைகளையும்கூட தாக்குவான்!!

இயேசுவின் ஜீவியகாலத்தில் ஜனங்கள் அவரைப்பற்றிக் கூறிய தீமையானவைகளைச் சற்று சிந்தித்துப் பாருங்கள். “அதே வார்த்தைகளைத்தான்” அவரை உண்மையாய் பின்பற்றும் சீடர்களைத் தாக்குவதற்கு இன்றும் ஜனங்கள் பயன்படுத்துகிறார்கள். ஜனங்கள் இயேசுவைப் “போஜனப்பிரியன், மதுபானபிரியன்” (லூக்கா.7:34) என்றும், “மதிமயங்கிய பைத்தியக்காரன்” (மாற்கு.3:21) என்றும், “பிசாசு பிடித்தவன்” (யோவான்.8:48) என்றும், “பிசாசுகளின் தலைவன்” (மத்தேயு.12:24) என்றும்... இன்னும் இதுபோன்ற பொல்லாத பெயர்களை வைத்து இயேசுவைத் தாக்கினார்கள். மேலும், வேதமும் மோசேயும் கற்பித்த உபதேசங்களுக்கு விரோதமாய் இயேசு “கள்ள உபதேசம்” பிரசங்கிக்கிறார் என்றும் ஜனங்கள் கூறினார்கள் (யோவான்.9:29). இவ்வாறாகவே, ஆண்டவரிடம் வந்து ஜனங்கள் சத்தியத்தைக் கேட்க விடாதபடி அவரிடமிருந்து அவர்களை விரட்டி விட்டார்கள். ஆனால் இயேசுவோ இதுபோன்ற ஜனங்களின் தாக்குதல் வாசகங்களுக்குப் பதில் சொல்ல வேண்டுமென சிறிதேனும் சிந்திக்கக்கூட இல்லை!

ஆம், தனிப்பட்ட விதத்தில் தன்மீது தாக்கிய எந்த குற்றச்சாட்டுகளுக்கும் அவர் ஒருபோதும் பதில் பேசவே இல்லை. அவர்போலவே நாமும் அவ்விதமே இருந்திடக்கடவோம்!